Der Dausigfiessler-Dänzer

Es isch emool e Dausigfiessler gsi. Das isch s Wunder gsi wie äär mit syne dausig Bai het kenne danze! Wenn er danzt het, so hänn sich d’Dier vom Wald versammlet, zum em zuez’luege, und alli sin vo synere Danzkunscht z’diefscht biyydruggt gsi. Nur ai Dier het der Danz vom Dausigfiessler nicht kenne lyyde, e Grott...

„Wie schaff yych’s numme, dass der Dausigfiessler uffheert z’danze?“ iberlegt si. Si het jo nit aifach kenne saage, dass iire der Danz nicht gfallt. Und si het au nit kenne bhaupte, si kenn sälber besser danze, denn das wuurd iire niemerts abnää. Zletschtamänd het si e deiflische Blaan usdänggt. Si isch aanegsässe und het em Dausigfiessler e Brief gschriibe. „Oo unverglyychlige Dausigfiessler!“ het si gschriibe. „Yych bi e ergääbeni Bewunderin vo Dyynere erlääsene Danzkunscht. Und yych wuurd gärn wisse, wie du bim Danzen voorgoosch. Hebsch Du z’erscht s lingge Bai Nummere 228 und denn s rächte Bai Nummere 59? Oder foosch Du der Danz aa, wenn Du s rächte Bai Nummere 26 und denn erscht s rächte Bai Nummere 499 lipfsch? Yych wart gspannt auf Dyni Antwort. Frindligi Griess, d’Grott.’

Wo der Dausigfiessler dää Brief iberkoo het, het äär sich zum erschte Mool im Läbe yberleggt, was äär bim Danze aigetlig macht? Weeles Bai biwegt er z’erscht? Und weeles Bai denn?

Das isch s änd gsi. äär hat nie mee danzt.

Aus dem Buch:
Sofies Welt
Von Jostein Gaarder
Roman über die Geschichte der Philosophie

Iibersetzig: Eeveli Scheerer

 

Animation fall back