Exgyysi und fuuli Uusreede

Der Fex und syni Lyt gän und hän Mie. Si schaffen an iirer Theggnigg und an dääre vo den Andere. Si stelle scheeni Brogramm zämme, dass es de Schieler e Fraid isch. Si erglääre, danze voor, korrigiere, muntere d Lyt uff, sin allewyyl giduldig, uffmerggsam, frindlig, uffgstellt, voll Idee und Elan, sälbschtloos, und annenander guet gluunt. Scho bym Uffstoo am Morge bischäftigt si nur ai Gidangge: Wie mach yych myyni Lyt hyt gligglig?

Kurz: Si hänn gar nyt, aber au gaar nyt Anderes im Sinn als s Wool vo de liebe Danzschieler und göön am Oobe vergniegt und in ainere Sääligkeit an d Aarbet.

Und denn kemme die Lytli, hän nit giebt, hän nur s Byyroo im Kopf ooder sin verliebt. Und die wisse ganz ginau, worum s Danzbrogramm nit glappt, ooder nit glappe kaa:

Der Booden isch z stumpf
Yych bii hyt nit im Schuss
Der verränggti Fuess macht mer wee
Der Boden ischt z rutschig
D Muusig isch z langsaam
Mi Syydehaas het Syytestäche
Gsungeni Muusigstigg hän kai glaare Rytmus
D Muusig isch z schnäll
Mit de neie Schue goot daas nit
Der Aarm vo mynere Frau isch z kurz
Der Doggter het gsait yych döörfi die Biweegig nit mache
Duu hesch es mir am letschte Kursooben esoo voorzaigt
Das söll falsch syy? Das hesch du mii aber no nie korrigiert.
Mit eme gläinere Bartner giengs besser
Aär fiert nit
Mit ere gressere Bartnerin giengs besser
D Muusig isch z lyyslig
Myy Kääferli folgt nit
Myni Frau macht sich schwäär
Dummerwyys isch myni Schultere vo Naduur so hoch oobe
Yych machs aaber lieber esoo
Soo spoot am Oobe goots nit
Du reedisch so undyttlig
Yych könnts, aber myni Frindyyn isch boggig
Im Byyroo isch alles Meeglige loos gsii
äär druggt mi
Sii stosst allewyl
Daas isch myyni perseenligi Noote
Mit dääne Schue und de hoochen Absätz kamme s Danzbai nit schwinge
Si losst sich nit fiere
Si weiss nie was linggs ooder rächts isch
Yych bii scho der ganz Daag ummegsegglet
Das gitt aaber Musggelkaater
Die andere kemme mir in d Gweeri
Mi Bartner het mi hogge loo und isch nit ko iebe
Es söll io Spass mache, daas wo duu verlangsch isch aber aasträngend
äär het zwai linggi Schue, yych kaas guet
An der Hochzyt han yych e lange Rogg aa, doo gseet me d Fiess nit so genau
Der Booden isch uneebe, das isch schlächt fürs Glyychgwicht
Yych will hit nit schwizze
Wenn yych uffe lueg kan yych mi nit khonzentriere
Wenn yych mir mee Mie gäbt, könnt yychs besser
Der Saal isch z glai
Morn goots besser
Yych lueg nit an Boode, yych lueg schreeg syytwärts
Der ander Danzleerer het das ganz anderscht welle.
Das han yych immer soo gmacht
Hyt isch mer der Ganarievoogel gstoorbe
Bisch du ganz sicher, dass das stimmt, was duu verzellsch?

Soodeli, jetz wisse mer worum s nit goot! Worum s nit goo kaa!

Bitte, liebi Danzfrindyynen und Danzfrind, wäär vo eich kaini Exgyysi mee waiss, kaa in dääre Lischte noocheluege, welli Uusreed äär scho lang nimmi oder no nie bruucht het. Die arme Danzleereryyne und Danzleerer hätte gäärn e weenigli Abwäggslig.

Vyyl Gspass winscht alle Danzbääse vo Häärze

S Eevely Scheerer

 

Animation fall back