DAANS TU DAANS

DANCE TO DANCE

DANCE TO GET HAPPY
DANCE TO REACH HEAVEN
DANCE TO MEET FRIENDS
DANCE TO GET FIT

DANCE TO
DANCE
!

Zur Neiereffnig vo der Danzschuel an der Gäärbergass 13 (eemoolig Danzschuel am Glooschterbäärg)

Syt em 3. Abrille isch es eso wyt. Noch fascht unändlige Voorbiraitige, Blaanige, Diskussioone, Termyynabmachige, schloofloose Nächt, unzäälige Deelifoon und Bsiech vo Baaselstädtischen ämter und Byyroos, nochdäm d Mooler, d Boodeleeger, d Eleggtriger, d Installateer und dZytigsreporter, Lyt vom Fäärnsee und vom Sänder Radio Balilisgg, Fotigraafen und Gitränggliferante koordiniert woorde sind, het der Fex Staadelmaa d Ereffnigsfyyr mit emene „Offeni-Diire-Daag“ aagfange, fascht hätt i gsait, mit emene Pauggeschlaag.

In der Baar bim Yygang vo der Danzschuel hän Kieche, Toorte und d Kaffimaschiine und unzääligi danzfraidigi Bsuecher gwaartet. Im Geegesatz zu uns, wo zur „Crew“ gheert hän, mit unsere wysse flääderige Hemmli mit der wyyrooten Uffschrift DANCE TO DANCE uff em Rugge, hän die kai Häärzglopfe ghaa und au kai Näärveflattere. Bald aber isch men erleest woorde und het kennen uffschnuufe und sich im Struudel vo den Eraignis goo loo. Der ganz Noomidaag lang sind abwäggsligswyys Lyt vo uns bim Sandstaiyygang an der Gäärbergass 13 gstande (wäär bihauptet 13 syg e Ungliggszaal?), hän d Passanten aagreedet, wo iine giaignet voorkoo sin: „Kan yych dii/Sii zum ene Stigg Kueche, emene Schlugg Kaffi yylaade? Und wie wäärs mit ere graatis Danzstund?“ Derzue hämmer de Lyt e Zeedel mit den Aafangszyte vo de Minilekzioone in d Hand druggt. Im Schnitt het men eppe 30 Mool die äänligi Froog stelle miesse, bis me duurekoo isch. Alli meegligen Antworten und Ussreede hets z gheere gää: „Ych ha kai Zyt. I ha schon e Kaffi khaa. Ych muess am zwai naime syy. I ha kai Luscht. Nai dangge! Was, Si wänn mi zunnere Danzstund verdonnere?“ Hii und doo het me kennen en Interessierte uss em Stroom vo de Passante fische, wo sich vilicht noch däm Noomidaag fir e Danzkurs wuurdi aamälde.

Scho am Yygang het men e bunts Tryybe voorgfunde. D Baarstiel sin glyy bsetzt gsii, d Glaiderbiigel in der Garderooben au. D Baarghilfene hänn sich nit iiber Langizyt kenne biklaage. Verbyy anere biyydruggende Zyylede vo Diploom vo den aagstellte Danzleerer und vor allem vom stolze Danzschuel-Inhaaber Fex sin si zum Hauptzyyl aaglangt: zum liechtiiberfluetete 300 m2 grosse Danzsaal, wo men in zwai Sääl kaa underdaile.

Am Zwelfi het d Marta mit ere Latino-Lekzioon aagfange wo biyydruggt, bigaischteret und der Graislauf aagregt het. Si het nit nur alli Dänzerinnen und Dänzer gloggeret, si het allnen e Lächle entloggt, was bi uns in der dytsche Schwyz nit esoo sälbverständlig isch. Si het nur e baar Sekunde bruucht, bis si alli im Sagg ghaa het.

D Rebecca het druff aabe d Mängi am 12:30 mit em Grundschritt vom Jive birueiget und bald het me feschtstelle kenne, dass fir e baar Lyt das nit glängt het und si hän aagfange frei z improvisiere. Am 13:00 het me Tango-Argentyyno-Kläng gheert. In kiirzischter Zyt het der Fex in syynere bikannte bildhafte Sprooch verzellt, wohäär dää Danz kemmi, dass d Danzbeeden in Buenos Aires nit so scheen glattgschliffe syyge wie doo und dass me deert dermit miessi rächne, dass men immer wiider lääbesmiedi Kakerlagge under d Schuesoole griegti, kaini glaine Fyychli, nai ganz groossi! Do isch es besser wenn me d Reegle nit vergisst: Fiess setze, nit glaite!

Am 13:30 simmer wiider in d Schwyz zruggkoo. D Fabienne isch im Foxtrott-Tämpoo mit allne Lyt rund umme Saal gloffe. Der Grundschritt het aim Baar soo guet gfalle, dass der Maa sich grad fir e Kuurs het wellen aamälde. D Reaggzioon vo der Partnerin: Yych ha nyt dergeege, aaber: gits denn no mee Schritt zum Leere?
Am 14.00 het der Philipp, uff Baaseldytsch der Fyppe, der Salsa-Grundschritt underrichtet. Syyni Filosofyy isch aini vo de vyyle Salsa-Aarte z leere, wo eender introvertiert isch, die wo mit Turnierdanze, Schou und Publikum nyt z due het, won e Danzaart isch, wo s inneri Erlääbnis zu zwait suecht.
Alli die wo am 14:30 nit an der Baar gstande sin und alti Bikannti bigriesst hän ooder neii Frindschafte gschlosse hän, es het immer no Kiechen und Giträngg ghaa wie im Schlaraffeland und es sin Alti und Jungi zämmegsässe, bunt duurenandergwiirflet, die hän kenne bim Esthi ins Ghaimnis vom Grundschritt vom Langsaame Walzer yygweit wäärde, au in daas vom Wiener Walzer, wo denne d Musigg schnäller woorden isch. Es ist e Fraid gsii, wie ganzi Raaiene vo Lyt sich an de Händ ghebbt hän, sich sälber in der grosse Spiegelwand bioobachtet hän und immer schnäller 1 2 3, 1 2 3 zellt und bainelet hän.

Am 15:00: Uffdritt vom pauer-glaadene, scho dur sy Keerpersprooch biyydruggende Rich. Dä het schnäll us em Hiirni vo de Dänzerinnen und Dänzer e Schaltzentraale gmacht, wo glyychzytig underschiidligi Informazioonen an sämtligi Musgglefaasere verschiggt het. Mit gnappe Kommandos und Handbiweegige het er e Mängi Lyt in Schach ghalte, wo in e Biweegigsrusch yyne groote sin, d Koreografyy isch immer aaspruchsvoller, schnäller, verzwaggter und aagreggter woorde. Hip Hop haisst dää Danz, wo, wemme glaubt, was Kursdailnämmer vom Rich saage, im Kurs so vyyl Fraid macht, dass me danzt und danzt und danzt, bis me fasch doot umfalli.

Zum Gligg ischs am Samschtig nit so wyt koo und me het sich mit em Cha Cha Cha-Grundschritt vo der Nicole ainigermaasse birueiget, am 16:00 het men e kurzi erfrischendi Voorfierig vo Lindy Hop gnosse und sälber e bitz probiert e baar Schritt z mache, doo derbyy hän die wo eender Standard-Type sin mit der grumme Haltig e bitzeli Mie ghaa.

D Lyt sin yyfrig yynen und uuse, die ainte hets lenger vor der Spiegelwand im Danzsaal ghebbt, die andere hän de Dift us der Baar nit kenne wiiderstoo, au het me noch allnen Aasträngige und Biweegige mit und ooni Partner ooder Partnerin der Duurscht welle lesche. D Danz-Feteli an de Wänd, wo der Michael uss syym Turnierfeteliarchyyf ussgsuecht und uf bsundere Wunsch vo der Diräggzioon uff Schwaarz-Wyss veränderet het, sin bistuunt woorde, wie au d Blueme ringsum, vor allem das wunderbare floräntyynische Bluemegstegg vo der Frau Stadelmaa im glainere Saal, äänen am grosse Saal. Dää isch en Augewaid!!!

Allne Pessimischte zum Drotz: es isch e Bombefescht gsii! Die ganzi Hektigg, alli schloofloose Nächt und Albdraim und Bidängge sin ummesunscht gsii. Scho am Noomidaag het sich der Fex und syyni Lyt iiber e Riisenerfolgg gfrait. Es hän au die sich gfrait, wo in de Danzpausen am Gliggsraad vo Thommen-Line hän derfe draaie und e Bryys (Däsche, Hoose, Boxerschoorts usw.) gwunne hän. Es hän sich alli die au gfrait, wo alti Bikannti wiider emool aatroffe hän und Erinnerigen us der Danzschuel ooder au anderi hän kennen usstusche. Hoffetlig glingen au alli Feteli vom Michael wie blaant, mit dääne will er nämmlig s ganzi Fescht fir Noochwält dokumäntiere. Er het „alli Linse voll“ z due gha.

Und daas isch eerscht d Helfti vom Fescht gsii!

Ab den Achti z Oobe isch die grossi Ereffnigsparty (Yydritt: Fr. 20.00 ingl. Gidrängg) mit diväärse Schous und emene Wettbiwäärb in Schwung koo. Kemme ächt nummen Eeregescht? Ooder numme e baar weenigi Bikannti, Verwandti ooder Frind vom ganze Tyym? Waas mache wenn...

Was mache wenn im Handumdraaien alli Glaiderbiigel und die ganzi Garderoobe bsetzt sin (der Liiferwaage mt de Garderoobeständer isch „ussgstiige“)? Zum Gligg hets der Peetrus nit lo räägne und mir hän nit au no nassi Räägeschiirm, aaber nur e Schwetti vo troggene Mäntel miesse versoorge! Mit Scharm hämmer die glaini Panne iiberbriggt, d Fraid iiber die Menschemasse wo yynekoo sin isch z gross gsii, do het me sich iiber glaini Details nit kennen uffreege. Der Lift het aastandsloos funkzionniert und het alli Zueschauer und Mitwiirggende vom Fescht in vierte Stogg vom Hauptboschtgibaid bifeerderet. Woorschyynts sind no nie soo vyyl Lyt uffs Mool do yyne koo.

Ereffnet isch der Oobe mt autäntische Piccolokläng woorde. „Wie hätts au anderscht kenne syy?“, muess yych als Lokaalpatrioot derzuefiege. D „Hofnaare“ muess ych in Baasel nit voorstelle. Die sin an däm Ooben e bitzeli gschpässig aagleggt gsii: Oobegarderooben und derzue Holzschue. Doo dermit hän si kenne d Choreografyy wo sich der Fex ussdänggt het (firs Häbsetheaater) mit helzige Deen und mit em Glappere vo de Fiess understryyche. Der ganz Oobe lang isch flyssig danzt, Wettbiwäärbszeedel ussgfillt worden und me het alli Daarbietige gnosse, wo alli uss den aigene Raaie gstammt hän.
E Mischig us Tschässdanz und Aerobig, voorzaigt vo der rassige Latino-Expärtin Marta Formoso Iglesias und iirer Schougruppe „7th Sense“ het der Saal zum Vibriere brocht. Die junge Zueschauer hätte sich lieber scho jetzt als eerscht speeter zumene Kurs aagmäldet, die eltere Zueschauer, wo nimme ganz esoo biweeglig sin hän sich d Lascht vo de Joor ewägg und e Jungbrunnen aane gwintscht.

D Erika (wo dahai e settige, aigene Jungbrunne bsitzt, das seet men iiren aa) und der Marcel Vökt, d Monika Karle und der Thomas Bielser, zwai Baasler Turnierbäärli, hän die gfellige Ladyynamerikanische und die elegant schwingende Standard-Dänz im Wäggsel zaigt. D Zuschauer hänn in der Publikumsrundi eender kenne wooge s dääne e bitzli glyychzdue.

Der näggscht Schoublogg het d Esthi Lauper in iirem Bricht fir Danzsport-Zittyg soo bischriibe:

„Zu wahren Begeisterungsstürmen hinreissen liess sich das Publikum dann durch Angela Zbinden und Stephan Joller (von der Showgruppe Tickle Toe Hep Cats), die mit ihrer spontanen, höllisch schnellen, wunderbar lockeren und enorm rhythmischen Boogie Woogie und Lindy Hop Show zeigten, dass diese Tänze gestern wie heute beim Publikum nicht nur ein Feuer, sondern einen ganzen Flächenbrand entfachen können! Der Lindy Hop Liebhaber und Fachmann Joe Namesnik wird in Zukunft für diese Tanzsparte bei Dance to Dance zuständig sein.“

Der neii Danzleerer im Tyym, der Philipp Traber, wo mit syynere Turnierpartnerin an der Salsa- Schwyzer-Maischterschaft der 2. Blatz ghoolt het, het uns zaigt, das han ych in der Bischryybig vo der Noomidaags-Minilekzioon scho erwäänt, das me e Salsa vo Puerto Rico kaa danze wo gfyylvoll, no yyneszue kheert isch. E bsunder uffmerggsaame Biobachter het kenne see, wie d Frindin vom Philipp, d Isabel Amigó vo Kopf bis Fuess Musigg, Gfyyl und Biweegig het kenne sichtbaar mache. Do hän der Michael und yych numme dänggt: Wenn das nur alli Turnierdänzer dätten aanegriege! Die Zwai hän e Stimmig aanezauberet wo aimoolig und seer perseenlig isch. Aifach voorbildlig!

Kaine, aber au gaar kaine vo de Zueschauer het noch der näggschte Schou gsait: „Daas kann yych au!“
Der Schwyzer und 3fachi Dytschi Maischter Rich isch en usgwiisene Spezialischt fir Hip Hop und Breigdans (Breakdance), är stellt au raffinierti Choreografyye (au fir bikannt Staars) zämme. Wie am Noomidaag, numme no uffwielender, no rasanter und no schnäller isch er mit syynere Schougruppe „Dance Nation Rich“ ummegwiirblet, het Keerperisolazioone, schnälli Drillige und Spring aaber au Richtigswäggsel wo me nit het voorhäärgsee zaigt und Biweegige mit ere soone Pauer, Prezisioon und Schnällikait, dass aim Heeren und See vergangen isch. D Bigaischterigsstiirm vom Publikum hän der ganzi Saal loo erzittere.

Scho bald Mitternacht? Das kaa doch gaar nit woor syy! Und doch hämmer miessen yygsee, dass das Fescht schnäll en änd gfunde het. Aigetlig het der Huuswaart erwaartet, dass Punggt 12 numme no Danzerinnerige im Saal ummewiirble. Ooni Läärme und ooni Musigg, aaber mit emenen unermiedligen Yysatz sin d Butz- und Uffryymgaischtli vo aim Egge zum andere ghuscht. Wäär am näggschte Daag wiider zum „Tatort“ zrugg gfunde het, het kenne maine es syygi am Vooroobe gaar nyt loos gsii, der Boode het glänzt wie nei, d Disch und d Stiel sin in Rai und Gliid an der Wand gstande, d Musiggaalaag het no gschwiige und d Garderoobe het läär vor sich aane gäänt, alli Kuechebreesmeli am Boode sin ewägggfäggt gsii.

Der ganzi Saal mit allne syyne Nääberyym het jetzt giduldig uffs näggschten Eraignis gwaartet, uff Danzlääbe puur und uff vyyli Kursdailnämmer. Turnier wäärde hoffetlig doo stattfinde, und nit numme in Standard und Ladyyn, es git no Anders im Lääbe, das hämmer am 3. Abrille yydrigglig mit uff e Wääg griegt. Wenn ändlig wäärde sich die Ussfierende vo ganz verschiidene Danzrichtige innere Danzfamyylie verainige? Iiberaal, nit numme an der Gäärbergass?

Was mir au no hän deerfen erfaare, isch gsii, dass en änd au en Aafang kaa syy. Das isch bildligg daargstellt woorde immene Bilderraame wo der Fex as Gschängg het kenne entgeegenää, gstiftet vom harte Käärn vom Tyym, mit der Mitwirgigg vo der Louise Bucher, wo an däm Oobe au aawääsend gsii isch, nadyyrlig. E Collasch mit vyylne Feteli us der Vergangehait (do dermit main y der Glooschterbäärg) zaigt dermit, dass men au immene neie Raame zämmeheebe kaa und in Zuekumft au wiird.

Alli, wo bim Fescht derbyy gsii sin wintsche sich vo Häärze, dass die nei Danzschuel mit volle Säägel wie an der Ereffnig uff Erfolgg zuestyyre wird, vyyli Joor lang und dass die Schuel fir unzääligi Turnier- und Gsellschafts-Dänzer vo allne Danzrichtige, den alte und de modäärne e neis Dehaim wird syy.

Eeveli Scheerer
08.04.04

 

Animation fall back