Rootschleeg

Rootschleeg fir Dänzer

Drambb dynere Daame rueig e baar Mool uff d Fiess. Das ferderet d Durbluetig. Au die nääbedraa hätte sicher gäärn e Massasch mit em Absatz.

Loss dyyni Daame rueig noch em Danz uff der Flechi stoo. Si isch schliesslig alt gnueg, zum sälber der Wääg an iire Blatz zrugg z finde.

E Baar bloggiert eich der Wääg? Danz aifach wyter, wie wenn si nit deert wääre. Dyyni Daame fäderet gärn der Uffprall fir dii ab. S andere Baar isch sowisoo schuldig; Aafänger hän uff em Barkett nyt verloore.

En unbikannti Dänzerin? Fang grad emool aa mit dyynere komplizierteschte Figuur. Si sell grad gsee, was du druff hesch!

Nimm immer e bsunders kumoodi Haltig fir dii yy. Der Heechemassstaab fir dyyni linggi Hand sind dyyni Auge und nyt anders. Nur so isch es richtig. Dermit verhinderisch du au im Fall vom ene Foti, dass men erkenne kaa mit wäm du grad danzisch.

Vergiss gar nie: E Frau kaa so schnäll bilaidigt syy, wenn der Herr iire nit der Hinder tätschlet.

Zaig immer dyynere Daame, wo du aane wotsch. Zie aifach an iirem rächten Arm, wenn du d Richtig aazaige wotsch. Heb derbyy die rächti Hand vo dyynere Daame ordetlig fescht. Dermit zaigsch du iire grad, wer der Stergger isch.

Pass uff dyy Bligg uff. Isch dyyni Partnerin greesser als duu, so isch iiren Usschnitt in der ginau richtige Heechi. Und sunscht kaa me der Boode, d Deggi ooder die frindligi Noochbere empfääle.

D Danzrichtig isch d Richtig wo duu aanedanzisch. Was kasch du bitti derfiir, wenn alli andere in die falschi Richtig danze?

Regglamier numme, wenn der DJ d Taggtgschwindigkait vo de Dänz under dyym Laischtigsnyyvoo leggt. Das zaigt, dass duu drusskunnsch und macht grossen Yydrugg. Danz denn uss Protäscht zum Byspyyl Cha-Cha-Cha statt emene Discofox.

Bim Wiener Walzer gwinnt dää, wo am Schluss vom Danz die maischte Baar iiberhoolt het. Doorum: Gib Gas!!

Fir Tango Argentino: Isch es z äng uff der Danzflechi? Kai Probleem, mit e baar scharf gfierte Voleos oder Ganchos verschaffsch du dir der neetig Freyruum.

Du liebsch d Ochos vo dyynere Partnerin? So fier grad e baar hinderenander, dyni Partnerin wird fir e bitz Biweegig danggbar syy.

Rootschleeg fir Dänzerynne

D Aaleegi isch wichtig. E Rogg ka nie z lang ooder z äng syy. Ooder z kurz. En Ooberdail setti mindeschtens ai Trääger ha wo aabetrutscht, wenn yyberhaupt. E tiefen Usschnitt, wo sich bi de Danzbiweegigen interessant variiert isch obtimaal. Das git em Danz die neetige Wiirzi.

Dyy Partner mechti e Hockeystick danze, duu aaber e Lasso? Kai Probleem. Ladies first. Usserdäm kasch duu sowisoo besser fiere. Wette mer?

Forderet dii e Heer uff, wo diir nit basst? Marggier e verstuuchte Fuess. Dass den e Minute speeter mit emenen andere Partner uff d Flechi glaitisch, liggt an syyne hailende Händ ooder isch e Folgg vo Spontaanhailig.

Hesch e neys Parfyym gschänggt griegt? Primaa, muesch umbidingt e Schwetti dervoo ufftraage. Dym Danzpartner wird vor Bigaischterig d Luft ewägg blyybe.

Leeg dyyni Fliigeli rueig uff den äärm vo dyym Heer ab. De kasch si mit em volle Gwicht bilaschte, das erspaart iim der Wääg ins Fitness-Stuudioo.

Rootschleeg fir baidi

Mached meegligscht en aagsträngts Gsicht und wooget joo kai Lächle. Schliesslig goots doo um Sport und nit eppe um eppis Vergniegligs.

Stegged eich e Kaugummi ins Muul, sobald iir uff d Flechi geent. Denn mien dir kai Khonversazioon mache. Passet aaber uff, dass d Blootere scheen im Taggt dien platze!

Wenn dir d Muusigrichtig nit erkenned, isch immer der DJ dschuld.

Bi Probleem mit em Glyychgwicht: Schimpfed iibers Parkett – es isch immer z rutschig ooder z stumpf.

Rootschleeg fir Turnierpäärli

Du hesch es gschafft e komplette Danz duureztreeniere ooni dy Partner aabezmache? Du zaigsch dermit, dass duu kai emozionaali Baasis hesch, au kai Duuresetzigswille fir erfolggryychs, kompetityyvs Danze!

Ab der A-Glass danzt me dynamisch, bresänt und aggressyyv. Floorcraft isch numme für d Aafänger doo. Wär mit Noochdrugg danzt het immer Blatz. Jeede Bodditschegg bringt e Punggt und schaadet nur däm, wo noochhäär ab der Flechi humpplet. Danz dyy scheerfschte Konkurränt in Egge und mach dervoor e Poose. (Lächle nit vergässe!)

Muesch di nie bi den andere entschuldige wäge Rämpler ooder Bihinderige. Das wurdi dii uff die glyychi niidrygi Eebeni aabezieh und dyyni mentaali Iiberläägehait verringere. Anderi Päärli sin nur wäge de Pinkt interessant.

Vernaig di joo nit vor em Publikum. Daas het kai Aanig vom Danze und d Zueschauer glatsche jo sowisoo.

D Wärtigsrichter wo kai 1 ziehn häns seer gärn, noch em Turnier uff dää Umstand aagsproche z wäärde. Zaigenes nur, dass diir das gaar nit basst. Iiberhaupt hän d Wärtigsrichter kai Schimmer vom modäärne Turnierdanze.

Bim Start isch es am Beschte, du stellsch di mit de maischten andere Päärli in glyychen Egge. Nummen esoo kasch du die innery Spuur bloggiere und in der Pole-Position stoo. Das bringt d Konkurränz us em Konzäpt.

Bi jeedem Turnier gits nur ai Gwinner und jeedi Mängi Verlierer.

Gesammelt aus Beiträgen in de.rec.tanz von Anja Girards, Marion Ruhm, Flups Baumann, Marko Beens, Kai Jürges, Joska-André B. Möller, Alex Roppelt, Dr. Richard Stoll.

Iibersetzig: Eeveli Scheerer

 

Animation fall back